أرسان للخياطة الرجالية ... ... لايوجد لدينا فروع

ممتازين 👍🏼

في البداية أعتقد أن التعليقات الي تقول ان الاستقبال والتعامل ممتاز، تحتاج اعادة بالنظر الا اذا كان الخدمة مرتبطة بموظف معين. لان للاسف تجربتي سيئة من وقت دخولي باستقبال من الموظف وهو يكلمني وقاعد يلعب بالجوال، ويرد بكلمه ورد غطاها كانه متفضل علي بالرد ومايبي يشتغل بسبب اني قطعته من الجوال. طبعاً بعد هالتعامل سالته كم تفصيل الثوب وبلغني ب ٢٠٠ ريال ومافي مشكله وحق اي محل يسعر وانا كزبون اقبل او ارفض لكن حتى ابجديات التفاوض او كسب الزبون بكلام زين غير موجوده، ويتعامل معك كانه تبي ولا الباب، ويوم سالته عن اسمه بداء يتهرب ورفض وبعد الحاح بتزويدي باسمه عطاني اسم أحمد والي اجزم انه غير صحيح بسبب تغير تصرفاته. انا صورت المحل من الخارج اثبات انه تقييم حقيقي، لكن لاحظت بعد مامشيت وانا اقلب الصور انه اول ماشافني رفعت الجوال هرب للداخل. بالنهاية الي هذا اوله ينعاف تاليه👎🏻

خياط غني عن التعريف متعامل معه من اكثر من ثلاث سنوات خياطة على اعلى مستوى واقشمه ذات جودة عالية وتعامل مميز من الاستاذ امجد الله يبارك لهم

تحديث 9/2021 تم التواصل معي من قبل إدارة الخياط، والحقيقة هذه البادرة تعتبر خطوة مميزة وموفقة لكسب رضا العميل والتحققق من معايير الجودة المطلوبة، وطلب الملاحظات والوعد بحلها قدر الاستطاعة، من يقف على المشروع الخاص به ويتابعه بهذه الطريقة يستحق كل احترام وتقدير، وموعود بالنجاح إن شاء الله. وبحسب إفادة صاحب الحلال بإنه يهتم بأدق التفاصيل وأعلى معايير الجودة فإن إعادة تجربة الخياطة بكل تأكيد ستؤدي إلى نتائج أفضل.. بالتوفيق وإلى مزيد من الاتقان إن شاء الله تحت التجربة ... تم استلام البروفة .. جاري التجربة وتحديث التقييم بعد تجربة العديد من الخياطين خلال الثلاث سنوات الماضية ويمكن معرفة ذلك بالرجوع للتقييمات الخاصة بي حيث أن الخياط الذي كنت أتعامل معه لأكثر من عشر سنوات وقبل الدخول في عالم خرائط قوقل اصبح بعيد وفي منطقة مزدحمة وتغيرت جودة الخياطين لديه .. فاصبح خيار البحث عن خياط مناسب لزاماً .. قمت بالبحث عن طريق قوقل ماب عن خياطين وقراءة التقييمات الخاصة بهم وتم الاستقرار على عدد ثلاث خياطين في مواقع مختلفة .. قمت بشراء عدد ثلاث قطع قماش لنفس القماش من محلات الكسائي على أن يكون القماش عادي ليس من الأقمشة المميزة لتجنب دفع مبلغ زيادة وكذلك لاختبار جودة الخياطة .. قمت بالذهاب لكل خياط على حدة ولبست نفس الثوب الذي يعتبر من ناحية المقاسات مناسب لي كثيراً .. هذه المقدمة سوف أكررها في جميع تقييماتي للخياطين الثلاثة الذين تم اختيارهم وسوف أذكر تجربتي بعد مرور فترة من تجربة الثوب وغسله لأكثر من مرة .. حيث أنه في تجارب سابقة يكون الثوب مميز جداً وجميل بالبداية ولكن بعد ثاني أو ثالث غسلة تظهر على المشاكل التي تعكس عدم احترافية الخياط .. وسبب اختياري لنفس القماش حتى لا يقوم الخياط بتقديم اعذار غير مقنعة وأن المشكلة بسبب القماش وغير ذلك من التبريرات الغير مقبولة أو الاعذار الغير منطقية. خيار أرسان بالنسبة لي جيد أو فوق المتوسط الخياط يقوم بغسل القماش قبل التفصيل مقابل خسمة ريال يتم إضافتها للتكلفة الإجمالية .. لديهم عطور ودهن عود .. جودة الحشوات مناسبة ولكن ليست الأفضل .. بالنسبة لي خياط سعره مناسب وجيد بشكل عام .. يقبل السداد بالفيزا

أفضل خياط رجالي تعاملت معه، دقه في التفصيل والمقاسات والمواعيد والتعامل الممتاز خاصة من الأخ أمجد تعاملت مع عدة خياطين وأسماء كبيرة وقديمة في المجال ولكن أرسان للخياطة قمة الإحترافية انصح فيه وبشدة

من افضل الخياطين اللي جربتهم، تعامل الأخ عبدالله راقي جداً واهتمام بالعميل وحرص على اتمام العمل في اسرع وقت، رغم الضغط اللي عندهم الا انه جهز الثوب اسرع من الموعد بثلاث ايام واشكره على ذا الشي. المقاسات والتفصيل جميل جداً وفوق ما توقعت. اسعاره مقارنة بخياطين اخرين تعتبر منافسة. اشكر الأخ ابو حسن على المقاسات المضبوطة والتفصيل المميز. انصح فيه بقوة

بأمانة اتعامل معهم سنتين من افضل الخياطين بالرياض والشباب امجد واحمد جدا محترفين باخذ المقاسات واذا عندك اي ملاحظة بالثوب يعدلوها لك وبعد التزام بوقت التسليم ملاحظتي على سعر التفصيل ١٩٠ يعتبر غالي الصراحة

من افضل الخياطين اللي جربتهم التعامل راقي جداً واهتمام بالعميل حرص على اتمام العمل في اسرع وقت المقاسات والتفصيل جميل جداً الاسعار مناسبة جداً

خياط أرسان قمة في الإبداع شغل نظيف مواعيد مضبوطة واستقبالهم يشرح الصدر تعاملهم راقي جدًا وشغلهم يبيض الوجه شكرًا لكم

نجمتين للتعامل وإلا الشغل مثل ما تشوف عينك لا والثوب بـ 400 ريال غالي جدًا على الشغلة ذي متخيل تدفع ذا المبلغ علشان تشوف خياطة زي كذا طبعًا كثر المدح الي بالتعليقات تشك فيه إنه متفق عليه، والدليل كثر اللايكات على تعليقات المدح😂😂😂 نصب

فصلت عندهم مجموعة ثياب وجبت الخامات من عندي، كانت المره الأولى لي عندهم والأخ أمجد اقترح علي اسوي بروڤه على ثوب واحد واذا مافيه ملاحظات كمل بقية الثياب وجهزها لي على نفس المقاسات وفعلاً هذا اللي حصل واستلمت البروڤه بعد ٥-٦ أيام وكان الشغل مُرضي وممتاز جداً بالنسبة لي، التعامل رائع ومحترم مع العملاء ويبحثون عن رضاء العميل، نقص النجمة فقط لأن ودي ياخذون بالإعتبار عدد الثياب اللي سيتم تفصيلها من قبل العميل فالإعتبار من حيث السعر ولا بقيّة الأمور ممتازة جداً وبارك الله لكم في حلالكم👌🏽

من افضل الخياطين اللي تعاملت معهم خلال الخمس سنوات صراحه خياط متميز حشوات ممتازه ومضمونه مقاسات مرتبه سواء المعلم عبدالعزيز اوسامي وينصحونك بالافضل الشكر والتقدير لصاحب المحل على الاشراف والاهتمام بالعميل اخلاق عاليه وتعامل راقي.. انصح فيه ارسان من افضل الخياطين في الرياض بالتوفيق لكم

شغل عالمي ماشاءالله تبارك الرحمن شهاده لله بدون مجاملات من افضل الخياطين للامانه اشكر امجد على حسن تعامله وحسن الاستقبال والدقه في المواعيد والاسعار مناسبه بدون مبالغة

رغم انه اول مره اتعامل معهم لكن حرفياً خياطتهم اسطوريه وتعاملهم راقي جداااااً وعندهم الترام بمواعيد التسليم

ما شاء الله تبارك افضل خياط فصلت عنده محل متكامل من حيث: - حسن الاستقبال👌🏼 - ثقة الاستاذ أحمد في أخذ القياسات - التفصيل قمة في الفخامة🙏🏼 آمل الاستمرار على هذه الجودة واتمنى لهم الافضل🙏🏼

للأسف شغل ترقيع بعد الاستلام تفاجأت فيه ثوب واحد لونه سكري مركب له المخابئ والرقبة من قماش ثاني ابيض ولذلك شيك على المخابئ هي نفس القماش او لا ونجمة كثيرة عليه

جبت الخامات من عندي وكنت متخوف بحكم القماش الي جبته غالي وكنت بفصل عند احد الخياطين الي انا اتعامل معه و ضامن شغلة ولاكن كان الخياط مسافر فا قريت التعليقات وقلت بجرب ونا كنت متخوف يعدم القماش ولا كن التفصيل كان ولا غلطة واليمني الموجود جداً محترم و خلوق كسبوني عميل على شغلهم الطيب الله يوفقهم ويبارك لهم 👍 (الصوره للمصداقية والله على ما اقول شهيد )

ما شاء الله تبارك الله ، فصلت عندهم وصراحه ابهروني بالتفصيل ولا غلطه ودقيقين جداً مهتمين في ادق التفاصيل ، اسعارهم رخيصه مقابل ثوب مميز وجودة عالية ، ومن افضل الخياطين اللي تعاملت معهم 👌🏻👌🏻

خياط ممتاز جدًا ومن اول تجربة اثبت لي فعلا جودة الخياطة والتفصيل كذلك وتعامل الموظف احمد قمة في الاخلاق والذوق والرقي الله يبارك لكم حلالكم تجربة تستحق الاعادة

عمل احترافي وشغل راقي ويهتم بادق التفاصيل كمان الاقمشه لديهم تأخذها وانت واثق انصح فيه يعطيهم العافيه